Plantun de Prouvènço

Pèr coumpara dos planto d'encò nostre

Aeluropus littoralis & Leptodon smithii

Aeluropus littoralis

Poaceae Graminaceae

Noms en français : Dactyle des grèves, Élurope des grèves.

Descripcioun :
Aquéu gramenum trachis majamen dins la sansouiro ounte ié flouris de mai à juliet. Rebalo au sòu e fai proun de fiéu (estouloun) que dounon de ramo que d'ùni se redrèisson. Lis esterlo porton de fueio apignelado sus dos renguiero (distico), verdasso e redo. Lis autro fan d'espigo de 1 à 5 cm, souvent vióuleto, caupan d'espigueto de 4 à 11 flour. Coumpara emé l'espouroubole-pougènt pèr pas s'engana, que ié sèmblo pamens (mai que poun bèn mai).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Aeluropus
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 1 à 5 cm
Flourido : Printèms - Estiéu

Sòu : NaCl
Autour basso e auto : 0 à 50 m
Aparado : Noun
Mai à juliet

Liò : Sansouiro - Mar
Estànci : Termoumediterran à Mesoumediterran
Couroulougi : Mediterrano-Touranieno
Ref. sc. : Aeluropus littoralis (Gouan) Parl., 1850

Crosso-de-Smith

Leptodon smithii

Neckeraceae

Nom en français : Leptodon de Smith.

Descripcioun :
Aquelo mousso pluroucarpo trachis majamen sus li pège d'éuse e de roure. Douno de mato plato pu o mens grando, li tijo soun un à dous cop penado. Bagnado fai de tijo plato alor que seco douno de crosso que sèmblon pièi de cascavèu. La fueio èi redouno-óublougo emé de bord lisc. La costo fai aperaqui li tres part dous de la longour de la fueio.

Usanço :
I'a pas trop pèr s'engana emé la crosso-de-Smith que se recounèis pulèu bèn. Es uno meno proun coumuno au nostre e dins lou relarg mediterran. Au contre devèn raro à l'uba, pèr acò èi marcado sus listo roujo categourìo LC valènt à dire soucit minour.